2Jo | ENQ | STEP |

a11 Pi 5:1; 1 Jo 2:21; 3 Jo 1

c2Jo 14:17

d43 Jo 3

e5Jo 13:34, 15:12,17; 1 Jo 2:7, 3:11

f6Jo 14:15,23-24; 1 Jo 5:3

g7Mt 7:15; 1 Jo 2:18,22, 4:1-3

h91 Jo 2:23-24, 4:15

i10Lo 16:17; Ep 5:11; 2 Te 3:6; Ju 4

j121 Jo 1:4; 3 Jo 13-14

JONEME PEPA PIAMO LAPONGE DOKO

Pii atupa wambao kandapenge

Joneme pepa laponge dake pyao pyasoo pituu, “enda epe Goteme yapao nyepae dokopi embanya wanepi” dupanya pepa dake pyao peekelyona lea-pyaa. Dopa leamo doko sosa mendenya Kitisene dupa kandao lao pia. Pii dutupame Kitisene dupanya masingi sakatasakamaiyoo mendeme mende auu kaya kaya pyoo katena lao lea-pyaa.

Joneme pepa piamo laponge dokonya pii lyaa dupa:

1—3 Pii wambao pepanya piamo dupa4—6 Mende auu kaya kaya pingi mana doko mupa7—11 Sambo pii dupa wandyuu kalyepape12—13 Joneme pii etao lasa leamo dupa

2 John

1 Namba ^a sosanya isingi akali dokome emba enda ^{▼▼a endaEnda dokopi baanya wanepi latae silyamo doko sosa mendenya endakali dupa kandao latae joo pilyamo lao masilyamano.} epe Goteme yapao nyepae dokopi embanya wanepi nyakamanya pepa dake pyao peekelyo. Nambame nyakama kini auu kaelyo. Dee nambame iki daa. Kiningi pii doko masoo kalyamino endakali dupa pitakame nyakama auu kaelyaminoaka. 2 Naimame ^c kiningi pii doko minao kalyamano dokonya nyakama auu kaelyamano. Naimame kiningi pii doko tanga tangapi minawaka katatama. 3 Naimanya Takange Gotepa baanya Ikiningi Jisasa Kataisapame naima kandao mona epe palyetala kondo kayao naimanya mona doko lyuu lasakatambinopa, naimame kiningi pii doko lao endakali auu kayao katamana.

Auu kaenge manapa kiningi piipa dolapo watao minapengena leamo doko

4 Naimanya ^d Takangeme mana seteamoli pyoo enda embanya wane mendapuame kiningi pii doko minao payaminopa nambame kandatala mona etete yaepeo. 5 Dee ^e indupa naima pitakame auu kayaloo pyoo katamana lao nambame enda epe emba langilyo. Nambame mana setapae enenge mende embanya pepa pyao peakala naelyo. Daa, wamba waka kandasoo mana setapae nyiamano ongoaka pyao peekelyo. 6 Naima ^f auu kayaloo pyoo katenge dokome naimame Gotenya mana setapae dupa watao miningi. Nyakamame mana setapae doko watao minalapape lapae pii doko wamba waka kandasoo siami.

7 Isa ^g yuu dakenya minakasingi endakali longo payatelyamino. Dutupame Jisasa Kataisa yonge katao epeana lao panasala naengema. Endakali dopale dupame endakali dupa minakasoo Kataisanya yandapipi joaka kalyamino. 8 Naimame piamano dupa mee jala nayatamopa nyakamame yole pitaka nyetamanopa lao nyakamame nyakama tange isokondape pipenge. 9 Kataisanya ^h mana pii lapae doko yalatala waka mende konda pyoo miningi endakali ongome Gote minala naenge. Mana pii lapae angi miningi endakali dokome Takangepa Ikiningipa lapota miningi. 10 Endakali ⁱ mendeme nyakama katatamino ongonya ipao pituu, mana pii lapae doko naminao ipatamo kandao doko, baa nyakamanya andaka taeme ipame lamo lao lanyala nayalapape. 11 Emba taeme epene lamo latamo endakali dokome baanya kalai koo dupanya awapa pitambinosaka pita.

Joneme etao lasa leamo pii dupa

12 Nambame ^j nyakamanya pii longo pepa pyakapenge silyamoaka doko, pepapi pyanjolepi dokome iki pyao langipu laka lao masala naelyo. Daa, naima mona etete yaepakondape pyoo katamana lao namba nyakama kalyamino ongonya ipupala enomba kandao pii langito lao masilyo. 13 Embanya kakingi Goteme yapao nyiamo dokonya wane dupame emba auu pyoo pitipi lelyamino.